الدردري في تصريح على مستوى خدمة 3G
بواسطة 3bdulsalam في يناير.26, 2010, تحت تصنيف قدحة كبريت
إقتصاد النزعة المركزية والأرقام الخلبية:
طالعنا أمس السيد الدردري رضي الشعب عنه، بتصريح يبشر به مجلسنا العتيد أن حصة المواطن من الدخل الوطني زادت . . ولأننا دولة ذات نزعة مركزية في كل الأمور ونكره التشتت والعشوائية والإنحراف حتى لو كان معياريا وكل النظريات التي تحمل صفة الفوضى وخصوصا الخلاقة منها، فقد قام السيد الدردري مشكورا – بالإعتماد على مقاييس النزعة المركزية - في حساب دخل المواطن من خلال توزيع مجمل ما جناه ثلة من مليارديرية سورية الجدد أبناء إقتصاد السوق الإجتماعي الحر على المواطنين المساكين، ليتضح له ولنا بلغة الأرقام التي لا تكذب أن دخل المواطن زاد!
الفقر والجوع وواقع الحال أيضا لا يكذب فمن نصدق ؟
قال ثري جي قال:
وردني اليوم على الفيس بوك رسالة من مجموعة MTN & Syriatel لسنا الأفضل لكننا الوحيدون من أحد الأعضاء ويدعى Bilal Aboras أعجبتني الرسالة لسخريتها المرة وأيضا حقوق اللطش محفوظة شريطة ذكر المصدر:
قال ثري جي قال .. شرح المفردات :
ثري : يعني تلاتة بالعنكليزي
جي : كلمة قديمة تقال للحمار ( انتو أكبر قدر ) كي يتحرك عندما يتنح و ما أدراك عندما يتنح الحمار و ما بيمشي متل تنتيحة بعض ناس ما بدن يخفضولنا أجور المكالمات ولا يعاملونا متل باقي امم الله المهم منرجع لموضوعنا .. و سبب تسمية ثري جي .. انو هاد الإنترنت الصاروخي ما بيمشي إلا تقللو جي شي سبطعش مرة
من شي سنة و نص أطلت علينا شركات دراكولا لتصنيع الجلطات بالموبايل .. بطنة الإنترنت الفضائي 3g اللي سرعة 7.2 ميغا بت بالثانية !!!
و كانو يبيعوها بحوالي 12000 ليرة و التغطية موجودة بمناطق قليلة و من جديد عملولها تخفيض ع اساس ( و الله فضّلو على راسنا من تحت ) و عملو حقو 6500 و الخط بـ 1500. و أحلى شي انو بعدين صار عرض خاص لفترة (( محدودة )) للطلاب حق المودم 3000 ليرة .. يعني لازم طلاب سوريا يمرقو كل يوم الصبح ع مراكز إم تي إع و سرقة تل يبوسو طـ …. و يدعولن بطول العمر ع كتافنا قبل ما يروحو ع مدارسن و جامعاتن
أول باشاتان سرعة التحميل بأحسن الأحوال شي 100 كيلو بايت بالثانية يعني هدول إما مستحمريننا رسمي او مفكرين إن البايت بساوي 72 بت هي بصرف النظر انو الشبكة بتروح و بتجي ( بلا معنى )
تاني باشتان جايبين أسوأ و أرخص نوعية من المودمات و تغطيتها ما بتكون كاملة إلا جنب البرج و إذا بعدت شوي بتصير التغطية عن طريق موبايل ثري جي أحسن بـ 3 أضعاف من تغطية مودمات هالأوام و عميخورفونا فيها حقها بالسعودية ( 120 – 150 ) ريال بالمفرّق. و المودم اللي نوعيتو جيدة سعرو 200 يعني 2400 ليرة و أحسن نوعية بكون حقو 250 ريال.
تالت باشتان على أي أساس انو 1 جيغا اشتراكها الشهري 1500 ليرة و كل 1 ميغا تحميل إضافي بليرتين و الشبيحة مو حاطين شي اسمو تحميل مفتوح ( بلا معنى ) و لما بتروح بتحكي مع شي رئيس مركز بقللك نحن ما دخلنا هي تسعيرة وزارة الإتصالات.
لك على مين عمتضحكو لك امة الله .. ع اساس انتو بريئين و القطة بتاكل عشاكن و وزراة الإتصالات بتشرب فنجان قهوة عندكم.
عذراً على الإطالة و على حرق أعصابكن و دمتم خواريف نجيبين لهازه الشركات العزيمة. حقوق النشر غير محفوظة بتاتن .. يسمح اللطش بشرط ذكر المصدر .. لسنا الأفضل و لكننا الوحيدون.
يناير 27th, 2010 on 2:00 ص
على سيرة الدردري العتيد… شفت اليوم تقرير للبي بي سي عن عمالة الأطفال بسوريا و مقابلة مع طفل و طفلة يشتغلون بشوارع دمشق.. شي يقطع القلب, و الأرقام مخيفة! (مثل أرقام البطالة و حد الفقر الأدنى و الأعلى الرسمية.. فما بالك بالحقيقة؟)
الله يساعد هالبلد يا زلمة.. و الله العظيم عايشين بمعجزة
يناير 27th, 2010 on 7:27 م
هلا ياسين . . حال الإقتصاد السوري خلال السنوات الأخيرة ومجمل إنعكاساته على الأوضاع الحياتية عموما والإجتماعية خصوصا، يذكرني بمشهد لحظة انكسار سفينة التايتنك لنصفين نصف غرق في البحر والنصف الثاني ارتفع حتى بات عامودي في الهواء قبل أن يغرق (جمد الصورة)
الإصلاحات الإقتصادية أو الشقلبات الإقتصادية التي حدثت قصمت الشعب السوري إلى قسمين غرق القسم الأكبر وارتفع ثلة من المستفيدين على أنقاض غرق الأغلبية.
ولا نقول إلا كما قال رئيس حكومتنا العطري ” حسبنا الله ونعم الوكيل”
يناير 27th, 2010 on 2:50 ص
سوريا بالفعل بلد المعجزات , ليس فقط استمرار الناس بالحياة رغم كل اللي عم يصير فيهم , بل و استمرار واحد مثل الدردري بالكذب , هناك نقطة أساسية هنا على ما يبدو , الكذب شرط ضروري لكي تستمر وزيرا في سوريا المعجزات
يناير 27th, 2010 on 9:11 م
أهلا ومرحبا أستاذ مازن، والله يا أخي ما بعرف يعني السيد الدردري عم يعمل البحر طحينة والواحد شوي تانية يفتكر حالو بسويسرا أو بالصين على قد ما يحكي عن القفزات النوعية اللي حققتها خططه الإقتصادية . . يبدو أن الكذب شرط لازم !!
مع التحية.
يناير 28th, 2010 on 1:42 ص
مرحبا
هلاء مشان الدخل أكيد زاد دخل المواطن بس من الفقر و التعتير و القلة و من الكوي بغلاء الأسعار ما فيا شك زاد ليش الكذب! , لعمة في عيونو أديش بيكذب هالزلمي إنو ضروري الكذب ياخي اسروق ع الساكت أحسن و أرحم و أخف وطأة على أبو اللي جابنا و بلا هالتصريحات و الأرقام الخلبية ما بيصير! .
مشان الثري جي شرح و لا أروع للمفردات
, و عم يقولوا إنو شركة زين عم تحاول مرة تانية تنزل بسوريا فياريت بلكي بيتحسن الوضع شوي , و مشان المودم هو أهوى نوعية بالعالم صنع هواوي و لا ما بعرف شو دينا لقيتها بمصر بما يعادل 1000 ليرة ! بقى بلا طلابنا الأعزاء بلا هم يحزنون , هلاء بزمانن قالوا بدن ينزلوا أسهم من سيريتل مشان الإكتتاب العام للجمهور! , بالله عملوها إلا لسه هالشغلة.
يا سيدي روح الله يجبر بخاطرك متل ما هديت شوقي للنزلة ع سوريا بهالشغلات , حرقتلي دمي سيريتيل أخر مرة بسوريا يحرق دمن.
يناير 28th, 2010 on 9:13 م
هو يمكن الدردري عم يحكي أحلامه واللي يتمنى يصير !! الله أعلم.
بالنسبة لشركات الإتصالات فالله يديم عروضها ع الشعب، بلكي بعد ما تدخل زين ع السوق تخلق جو تنافسي فعلا، بس الخوف انه الشباب يحطو شرط ما تعمل شي بدون تنسيق الشركتين وهاي مو بعيدة بنوب.
تحياتي
يناير 29th, 2010 on 8:17 م
For economy:
Sometimes economists do not admit their failure, this case here. The Syrian GDP increased 60% between 2004 and 2009 but that a nominal GDP without the consideration of inflation and population growth. This way the rising GDP means nothing but negative effect on populace as we have seen a whole section of the country went 80% under the poverty level and they gave each one a basket for one time. Abdulsalam, you do the math to find out the inflation and applied to get the real GDP of GDP PPP as to reflect on individual citizen.
For 3G:
It is amazing not to understand that this technology work only in market economy, mean free market, all compete to provide the service. In Syria Market economy mean monopoly for on
btw, notice Syplanet not working for 4 days now, I usually pick your post from there?
يناير 29th, 2010 on 8:18 م
sorry missed one line:
after monopoly: for one man who apply market economy to him to do what he wants?
يناير 31st, 2010 on 7:44 م
كلامك صحيح بلال، توجد حيل لا تنتهي لتجميل صورة الوضع الإقتصادي سواء لبلد أو لشركة، لكن وعلى رأي المثل الشعبي المصري ” المي تكدب الغطاس”، للاسف لا توجد لدي معطيات لأتمكن من حساب الدخل الحقيقي للفرد السوري، لكن ربما أقوم بتوضيح مفهوم GDP وكيفية حسابه في تدوينة منفصلة ومن يملك المعطيات سيتمكن من الوصول إلى النتيجة بسهولة.
وبالنسبة للعبة المونوبولي فيا صديقي خصوصيتنا الثقافية وعاداتنا التي تحثنا على الإيثار والتضحية تمنعنا أخلاقيا من التنافس والتناحر على متاع الحياة الدنيا، وكمان نزعتنا نحو المركزية والواحدية تفرض انه حتى في ظلال الإقتصاد الحر لازم تكون الدفة بيد جهة واحدة أو شخص واحد
بالنسبة لمتابعة المدونة، فيك تشترك برابط الخلاصات أو تسجل إميلك ويصلك جديد المدونة أول بأول وبلا منية سيريا بلانيت
فبراير 17th, 2010 on 4:39 م
أصبح إسم الدردري في عروقي سماً أتوق إلى الخلاص منه …
يبدو أن لديهم جميعاً الرغبة في التجمع لاكرههم فرادى وجماعات .
من سيرياتيل إلى إم تي إن إلى السيد الدردري حفظه الله ورعاه
تحياتي
فبراير 17th, 2010 on 9:05 م
الله يشفيك ويشفينا يا أبو حجر، قول امين.
يوليو 22nd, 2010 on 8:30 م
لأ والأضرب أنو لما تسدد فاتور بتلاقي الصفحة كلها رسوم وطوابع ومدري شو وفوق كل شي نص الخدمات الي بيقولو إنها مجانية (داخل ع الله) بتطلع بمصاري …. بتزكر أنو صديقي أنس كتب عن هالشي
http://anasonline.net/2009/06/%D8%A5%D8%AD%D8%B0%D8%B1%D9%88%D8%A7-%D9%85%D9%86-%D9%81%D9%88%D8%A7%D8%AA%D9%8A%D8%B1-%D8%B3%D9%8A%D8%B1%D9%8A%D9%8E%D8%AA%D9%84-%D8%A7%D9%84%D8%AE%D8%A7%D8%B7%D8%A6%D8%A9/